人生倒轉行（上）
我就嚟死啦。
我今年九十歲，做過幾份工，愛過幾個女人，幾年前入咗老人院。
人生好似冇咩太大嘅遺憾，但望住來來往往嘅後生姑娘，我忍唔住諗，如果我可以後生番就好啦。
不過，諗都無謂，我感受到，我嘅呼吸漸漸停止。
我心中默念，2021年2月14日，我宣告死亡。
過多一陣，我睜開眼，嗰種窒息嘅感覺消失咗，睇嚟我今日未死得。
我照常起身，拖住周身病痛嘅身體去食飯，咁又一日。
第二日，我聽到兩個姑娘傾計：「聽晚情人節喎，你男朋友有冇約你？」
聽晚情人節？明明尋晚就係情人節。
我望望個日曆，居然寫住2021年2月13日。
跟住落嚟，日子一日一日咁倒轉行。
身邊嘅人好似冇發現呢個秘密，大家仲成日講「聽日」、「未來」。
而我身上嘅病痛都漸漸減輕，五年前，我係因為身體愈嚟愈差，自問好快就冇能力再照顧自己，先揀咗入老人院。
但依加，我身體好咗，自然唔駛再留喺老人院。
五年後，即係我八十五歲嗰年，我離開老人院。
我可以話畀大家聽，倒轉行嘅人生，真係好開心。
入老人院前，我會去執紙皮幫補家計，我雖然有少少積蓄，但老人家醫療費好貴，又唔知自己幾多歲先會死，點都要積穀防饑。
依加，我唔駛再執紙皮，甚至每一日都可以揮霍自己嘅積蓄。
反正「聽日」……應該話，係「尋日」，所有錢都會出現番晒喺我戶口度。
我知道，我嘅未來會愈嚟愈美好。
我八十歲嗰年，我老婆死咗，從此我嘅人生唔再有快樂，我想落去陪佢但又冇勇氣。
人死不能復生，我以為我嘅困境係唔會解決到，點知，我終於有重新再來嘅機會。
換句話講，五年後，老婆就會復活，我哋會一齊愈嚟愈後生，重新經歷愛情中嘅所有美好。
而且，我已經好了解老婆，我知道我哋咩原因會嘈交，呢次就可以從容避開所有地雷，對老婆更加好。
時間繼續倒帶，終於去到老婆復活嗰日，應該話，老婆臨死嗰日。
佢捉住我隻手，有氣無力咁講：「衰佬，我走咗之後，你唔好咁傷心，要小心自己嘅身體……」
「唔會唔會，明天會更好啊。」我衝口而出，面上係壓抑唔住嘅笑意。
闊別二十年，終於見番老婆，梗係開心啦。
而且我仲知道，老婆雖然今日會「死」一次，但佢嘅身體會逐漸好番……
「我都就嚟死啦，明天會更好？你係咪出面有第二個？」老婆勃然大怒，大喝一聲。
我冇想像過，一個垂死嘅女人，都可以爆發出咁大嘅力量。
老婆鬧完我之後，好似用晒所有力量咁，瞪大雙眼，就咁斷咗氣。
雖然「上一世」老婆都係今日死，但對比佢上一世嘅死亡時間，係早咗三個鐘。
換句話講，係我管唔住把口，激死咗老婆？
好彩，聽日佢會再次復活，會一日比一日年輕同健康。
除咗呢個小插曲之外，其他一切都如我所料。
我由八十歲變成七十歲、六十歲……重新踏入職場，仲要一開始就做最高Grade。
雖然我唔可以憑「預知能力」去搵快錢，但我亦唔需要儲錢為「將來」作準備，所以錢永遠都夠用。
下集：https://bit.ly/3aY4LEG
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #人生倒轉行
Search